ХАЙДАРАБАД (ҮНДІСТАН), 2026 жылғы 29 маусым – Қазақстанның регби-7 бойынша ұлттық құрамасының капитаны Магомедрасул Магомедов отандық спорт тарихына тағы бір жарқын жетістік қосты. Ол Үндістанның Хайдарабад қаласында 28 маусымда аяқталған беделді коммерциялық франшизалық HSBC Rugby Premier League (RPL) 2026 турнирінің екінші маусымындағы өнерін сәтті аяқтады.
Магомедов жарыста «Bengaluru Bravehearts» («Бенгалуру Брэйвхартс») франшизасының намысын №23 ойын нөмірімен форвард позициясында қорғады. Екі аптаға созылған тартысты дода барысында Gachibowli стадионында команда жоғары деңгейдегі ойын өрнегін көрсетіп, турнирдің қола жүлдесін жеңіп алып, құрметті үшінші орынға ие болды.
Үндістанның Rugby Premier League (RPL) лигасы – қазіргі регби-7 әлеміндегі ең ауқымды әрі бірегей коммерциялық жоба. Турнирді Үндістан регби федерациясы президенті Рахул Боуздың жетекшілігімен және GMR Sports холдингі ұйымдастырады. Аңызға айналған крикеттегі Indian Premier League (IPL) үлгісімен өткізілетін бұл жарыс әлемнің ең үздік регбишілерін бір алаңға жинайды.
Биылғы маусымда лигада Жаңа Зеландия, Фиджи, Оңтүстік Африка Республикасы, Австралия, Аргентина және Ирландияның HSBC SVNS әлемдік сериясының жұлдыздары әлемнің үздік бапкерлерінің жетекшілігімен өнер көрсетті. Қатаң драфт жүйесі нәтижесінде әлемдік деңгейдегі ойыншылар, үндістандық спортшылар және дамушы регби елдерінің үздік легионерлері бір команда құрамында бақ сынады. Осындай жоғары деңгейдегі турнирге Қазақстан ұлттық құрамасының капитанының шақырылуы – қазақстандық регби мектебінің халықаралық деңгейде мойындалғанының айқын дәлелі.
«Bengaluru Bravehearts» сапындағы өнер Магомедрасулдың кәсіби мансабындағы маңызды белеске айналды. Ол әлемдік регбидің беткеұстар ойыншыларымен бірге алаңға шығып, соларға қарсы лайықты ойын көрсетті. Австралиялық Генри Хатчисон мен аргентиналық Лусиано Гонсалес секілді жұлдыздарға қарсы сәтті қорғаныс әрекеттері мен алаң ортасындағы батыл шабуылдары қазақстандық регбишілердің әлемдік деңгейде жоғары бәсекеге қабілетті екенін дәлелдеді.
Магомедовтың RPL 2026 турниріне қатысуы халықаралық регби қауымдастығының назарын Қазақстанға аударды. Бұл тәжірибе мен жоғары қарқындағы кәсіби лигада жинақталған тактикалық шеберлік ұлттық құрамаға үлкен пайдасын тигізіп, алдағы маңызды халықаралық жарыстарда команданың әлеуетін арттыратыны сөзсіз.
«Біздің капитанымыздың Үндістандағы RPL секілді беделді турнирге қатысуы – тарихи оқиға. Магомедрасул бұл жарысқа тек қатысып қана қойған жоқ, ол өз командасымен бірге Олимпиада чемпиондары мен Әлемдік серия жұлдыздарына қарсы ойнап, лиганың қола жүлдесін жеңіп алды. Бұл баға жетпес тәжірибе ұлттық құрамамыздың алдағы Азиядағы маңызды жарыстар алдындағы дайындығына зор серпін береді», – деп атап өтті Қазақстан регби федерациясында.
Қазақстан регби федерациясы Магомедрасул Магомедовты Rugby Premier League 2026 турнирінің қола жүлдесін жеңіп алуымен шын жүректен құттықтайды және ұлттық құрама сапында жаңа жеңістерге жету жолындағы дайындығына сәттілік тілейді!
Қазақстан Республикасы Регби федерациясының баспасөз қызметі
Телефон: +7 (701) 740-23-97
E-mail: Kazakhstan_rugby.kz
Федерация командаларды дайындауда жан-жақты көмек көрсеткені үшін ресми серіктестері мен демеушілеріне ерекше ризашылығын білдіреді: Бас демеуші – «Sport Qory» туризм және спорт индустриясын қолдау қорына, «BI Group» құрылыс холдингіне, «ForteBank» қаржылық серіктесіне, «Kazakhmys» тау-кен компаниясына, «Subaru Kazakhstan», «Астана Моторс», «Samal Su», компанияларына және «Тексол Транс» ЖШС-не, «Темирбетон-1» ЖШС-не, ЦС ФСО «ДИНАМО», «Raavah Aparthotel», «Stingz Sportswear», «Қазақстан Республикасы Туризм және спорт министрлігі», «Спортты дамыту дирекциясы», «Qsport»
